Bulan

Karya "Jabal Tarik" 


Bulan I


Nyawang bulan  nu imut ngagelenyu bangun nu isin,

Disimbutan karembong saulas mehong

Atrana ngan saliwatan, 

nyampeur harepan nu nyumput siga nu pundung

Ditutupan kamelang nu ngalongkewang

nyingray kalangkang nyipuh diri 

meh  henteu ringrang.


Bulan II


Aya bulan ti belah wetan,

cahyana peuray siga nu humandeuar,

Rek ngabejaan yen tunggara tacan lekasan.

Aya bulan ti lebah wetan,

mingkin pudar ilang gemprayna

mawa carita nu tacan tamat

Mungguhing Gusti nu pasti ngaturna

kuring bati  sumerah diri.


Bulan III


Geuning bulan teh nembongan deui, anteb neuteup imeut siga nu sono 

bangun rek mupus kalangkang hariwang 

nu kamari ngalongkewang satukangen raga rumingkang.

Geuning bulan teh nembongan deui, caang ngempray mawa komara, eces ngaharewos nepikeun beja ti Nini Anteh yen hidep bakal ginanjar kawilujengan dibekelan pare sageugeus ladang ngahuma di bulan.


Gedong sigrong sisi Pasantren, 

6 juni 2020.

Subscribe to receive free email updates:

0 Response to "Bulan"

Post a Comment